Ob Stadtfeschd, Waifeschd oder zom Gebortstag, zom Motorrad- oder Wandertreffâ,
zom Vereinsfeschdle, Firmafeier oder Clubkonzert, ob drennâ oder draußâ,
ob laut oder lais, zom Hoggâ oder zom Danzâ, mir spielad für Euch die richtigâ Musik.
Mir heizâd ai mit onserem Rock und Blues uff schwäbisch. Mir sengad wie ons Gosch g'wachsâ isch, nämlich grad raus. Mir rockâd die MUNDART.
Mir, des isch d'r "Werner" (Werner Bohner) an de Drommlâ, d'r "Woga" (Wolfgang Augustin) am Bass, d'r "Gerdle" (Gerd Härer) an d'r Gitarr, also a klassisch's Rock-Blues Trio mit G'sang
Bei onsere Oldies isch aus C.C. Rider zB. "Sisse Weiber", aus Radarlove "Raddascharf", aus "Mary had a little Lamb" "Mary gôt mol wieder fremd" wordâ ond so weiter.
Onsere oigene Lieder fendâd ihr auf onsera erstâ CD "Wilde Nächt", 12 Lieder "älle uf schwäbisch, älle von ons, älle erdig, frech ond rau ond älle drehâd sich om Liebe, Triebe, Hiebe ond Diebe ond uf onser neue CD "D'r Schwob - I Sag jo nix, i moin jo blos"
hen mir grad so weiter g'macht. Haischrecke (zwoiboinige) ond Engel, Rock'n roll Debba
und Superstars, Schwobamädle und Mämaschine ond no einiges mehr send do die Themâ. Ond ganz wichtig, vorallam got's ons om d'r Spaß.
Mir spielad em Ländle omanander, von Bad Mergentheim bis Amtzell,
vom Schwarzwald bis uft Ostalb. Mir hen beim SWR4 auf em Stuttgarter Weindorf g'spielt, auf viele Stadtfescht ond OpenAir-Veranstaltonga, en namhafte Clubs ond Kneiba,
aber au en der JVA Stammheim hen mir scho Gratiskonzerte für'd Insassâ abg'liefert ond koiner isch drvo. |
